ST'ANNU NOVU…

St'annu novu mi rùsica la menti
ca si varija arreri a na fulìnia
tangilusa di negghia, spirlucenti
d'azzolu.
Fucularu d'amarostica
jurnata di pulèria, stu scanneddu
jàjiru e làppiu di televisuri
a la ntrasatta,
scattijannu,
japri
scatula ciarlatana di civetti
ca stasira bannijunu quatumi
supra na schigghia sfàusa di saxy.

Mi rùsica la menti sta parrata
ciocca d'un «Bossu» ca va pridicannu
la liggi a la frattina,
e li cunigghia
l'ascutunu a l'agnuni, spitittati.
Ma lu brijanti sardagnolu allàrica
brazza di ficodinnia a naschijari
la punintata fracca di ciddami
e 'lludisci la notti masticannu
cu denti biancu scarda di nuragu,
comu si fussi gomma amiricana.